Përshëndetje të gjithëve,

Emri im është Anisa dhe po ju drejtohem me shumë shpresë në një nga momentet më të vështira të jetës sime.

Në vitin 2017 u diagnostikova me një tumor në tru në anën e djathtë (acoustic neuroma). Në të njëjtin vit iu nënshtrova operacionit të parë në tru për heqjen e tumorit. Gjatë operacionit u dëmtua nervi facial dhe kjo më shkaktoi paralizë në anën e djathtë të fytyrës.

Menjëherë pas kësaj më është dashur të bëj një operacion të dytë për lidhjen e nervit facial me një nerv tjetër (nervin e gjuhës). Pas muajsh të gjatë fizioterapie arrita të rikuperoj rreth 80% të funksionit të fytyrës.

Në vitin 2021, mjekët zbuluan se tumori ishte rritur përsëri dhe u detyrova të bëj një tjetër operacion në tru. Ishte një periudhë shumë e vështirë për mua dhe familjen time, por vazhduam të luftojmë me shpresë.

Fatkeqësisht, tumori ka filluar të rritet përsëri.

Në vitin 2025, rezonanca magnetike tregoi një tumor të mbetur me përmasa 14×12×10 mm.

Në janar 2026, tumori është rritur në 19×18×15 mm, që do të thotë një rritje rreth 5 mm vetëm brenda një viti.

Sot kam humbur plotësisht dëgjimin në veshin e djathtë dhe tumori vazhdon të rritet.

Mjekët më kanë rekomanduar trajtim urgjent me radiokirurgji të avancuar, për të ndaluar rritjen e tumorit para se situata të bëhet më e rrezikshme.

Koha është shumë e rëndësishme, sepse tumori po rritet shpejt. Nëse nuk arrij ta trajtoj në kohë, mund të detyrohem të bëj një operacion të katërt në tru, i cili ka rrezik shumë të madh për shkak të ndërhyrjeve të mëparshme.

Mjekët na kanë paralajmëruar se një operacion tjetër mund të ketë komplikacione serioze, si:

• hemorragji në tru gjatë operacionit

• dëmtime të rënda neurologjike

• ose paralizë të përhershme

Trajtimi me radiokirurgji që mund të ndalojë rritjen e tumorit kushton rreth 30,000 €, një shumë që është shumë e vështirë për mua dhe familjen time ta përballojmë.

Pas viteve me operacione, trajtime dhe shpenzime të shumta mjekësore, kemi arritur në një pikë ku nuk mund ta përballojmë këtë kosto vetëm.

Prandaj po kërkoj ndihmën tuaj.

Çdo kontribut, sado i vogël, do të më ndihmojë të bëj trajtimin që më duhet për të ndaluar rritjen e tumorit dhe për të pasur një shans për një jetë normale.

Nëse nuk keni mundësi të dhuroni, ndarja e kësaj historie me të tjerët do të thotë shumë për mua.

Faleminderit nga zemra për kohën tuaj dhe për çdo mbështetje.

Me shumë mirënjohje dhe shpresë, Anisa .