Nu Cung Hnem & Innsang Bomnak

Falam peng, Zomual khua ih siatralnak April 30, 2017 zaan ih thleng Pa Khup Hlei Mang ih a thainu, Nu Cung Hnem cu a fapa kum 2 mi te, Ngun Sui Bawi cun a hlam ruangro!! A nu cun a fapa ih umhar le a ngainak pawl hahduahdo cingin pialral a rak kai zo fawn!!

Ziangtheilo nauhniang te cun, tu le tu ka nu khawi ah a um? Ka u te pahnih teh khawi ah an feh? Ziangah ka nu cu a rak tlung hrihlo a ti? A pai' hrangah ziangtin a let ding!! Rel ding theih a va har zik em!!

Zantlai a kim, nauhniang ihthah a thaw lo, duat tei' rawl fahtu a nu tello in a pum a puar theilo. A nunnak in amah hrangih nun petu a nu a hlam!! A ngai bikmi a nu cu kirzai a rel theilo. A cui siatralnak meikang cu!!! Nauhniang te zaantin mangbang anhai in a um. Zing nithar in a nu a hlamnak a titam sin... Aw hibang ṭian awk hi a va na em!!

Kan Bawmnak An Va Tul Em!

Nauhniang ih ṭahnak le umharnak hnemtu ding hrangah midang ih hnemnak le umpinak hngak hlah. Nangmah rori khal Vancungmi na si thei. Na tuahthei mi sunsun te thawn na kut saan ve aw.

Sumpai, Thilri, Thazaangpeknak le a dangdang mah le tithei tawk cio thawn theihtawp suahin bawm cio uh si.

Tu fang te hi naute le a pa lawng umhar lungleng zetin caan an hmang.

Fanu Neih Sun Mai Bawi Tha Men Zuun Ah A Nu Luaithli A Hnul

Kangmei ih a ciam pimi Bu Tial Nei Dim ih a fanu neihsun, Kum 11 mite Bawi Tha Men, a nu ih a zuun tuar luaithli a hul theilo. Phun 5 ong pekte a si ruangah phun 6 kainak ding hrang a nu cun, kuli hnaṭuan in a fahniang le hrang a feh. Pa an neihnawnlo ruangah a nu cun a u le pathum thawn a hmeihpi.

Nunhar fualfo ruangah ruun in hmunkhat hlum man loin a nu cu fanau hrang a sur le sa ah a phar diapdo. Cu laiah zangfahnak neilo kangmei cun a fanu neihsun Mai Bawi Tha Men cu zaan a ih thahthawt laifangah a nu le a unau pawl mangṭha tita man lo in a ziampi. Lungthin hi a kuai in a na ko!!

Riahsiat tuartu hi innsang pahnih hnenah kan tithei tawkte zahlan cio uhsi!!

Hi tiih lungkuai thinpem za an parih a thlen laiah kan ni a laicin unau pi Chin mi pawl, an riahsiatnak tuarpi loin kan um theilo! Thlacamnak te talin bawm cio uhsi.

An Thuhla

Chin ramkulh, Falam peng, Phautluan Area, Zomual khua ah 2017 April 30, zan nazi 11 hrawng ahkhan inn pakhat a kang ih nauhak pathum tel in minung pali in an nunnak an can phah thu theih a si.

A kang mi inn hi Pa Than Nawn ih inn a si ih, inn a kang lai ahhin an inn ah minung pakua, mipa panga le nunau pali, an riak. A thi mi hi Pa Than Nawn ih fapa Khup Hlei Mang ih nupi Nu Cung Hnem (kum 26), an fapa Salai Zung Tin Piang (kum 5), Salai Eleven Za Kap Ve (Kum 4) le Falam ihsin a ra tlawng mi Mai Bawi Tha Men (Kum 11) an si.

Nu Cung Hnem hi nauhak pawl runsuah a tumnak ah amai' nunnak hloh phah a si ih, Pa Khup Hlei Mang tei' sungkua ahcun amah le an fa nauta bik lawng an himdam. Pa Khup Hlei Mang tei' sungkua hi nu le pai' inn ah a um mi an si.

Meisa hi inn hnuai ih vutcam an khawl mi ihsin a kang thok mi a si. An ihnak hnuai zawn ihsin kang mi a si ruangah an tlansuah thluh manlonak a si.

Zomual khua ahhin inn 31 an um ih, tui' ttum inn kang ah inn dang cu a kang kai lo tiah theih a si.#

+++++++++++++++++++